Meru FmMeru fm news

Marianne Keitany : Ndatirimanire ria mbere na Linturi obisine ya munini wa rais, William Ruto

Marianne Kitany, uria aari mwekuru wa Senator wa Meru Mithika Linturi riu niaithurite ati kagita kambere gutirimana na Linturi kaari kagita karia munini wa rais William Ruto amutumite kuri Linturi kumuromba eberie yendikithia riawe ria kwenda uria waari minister wa Devolution kagitani kau Anne Mumbi Waiguru kubutwa wira.

Kagitani gaka, mwankani wa 2014 mwerini wa kana, Waiguru arumiriritwe na urito ni igamba riegie nkukumo ya mirioni 791 cia rwang’i rwa NYS.

Akiruta uira waawe umunthi kortini ya Milimani mbere ya mugambithania munene Peter Ngare, Kitany augite kagita kaawe ka mbere gutirimana na Linturi kaari obisine ya munini wa rais, William Ruto, mwankani wa 2013 nyuma ya gutaarwa kwa Ruto ta munini wa rais, kuria nawe ari akuthuurwa ta murungamiriri munene wa aruti ngugi obisine iu kana Chief of Staff.

Mr Linturi, ruteereni rwarwe nawe ari akuthurwa ria kairi ta mubunge wa Igembe South na kiama kia TNA.

Kuringana na Kituny, munini wa rais niamwathite atumikire mateta mengi maria Linturi akinyagia obisine iu kagita gwa kagita, na au nio kwari kiambiriria kia ndugu yao.

Mwerini wa December mwanka wa 2018, nirio Ms Kitany akinyirie kortini yendikithia ria kwenda gutigana na  Mr Linturi, iguru ria kiria augire ni kunyariirwa, Linturi gutuma ndugu cia kiwendo na ekuru mangi oamwe na kwithirwa Linturi ari na mwekuru ungi au kabere mbere ya magurana.

Ruteereni rwaawe, Linturi ainyiririe ati we gutiri kagita ajukitie Ms Kaitany rasmi ari ta mwekuru waawe. Nkuruki Linturi niarigirirue gutumira kana kurita mbeca kuuma kiri bank 5 mwanya iria 2 mama marugurite amwe mwanka riria igamba riri riegie gutigana kwao rikariika.

Ms Kitany akathie nambere kuejana uira waawe mbere ya korti ntuku ya ruuyu, ntariki 21 cia mweri wa 8, 2019.

Show More

Related Articles