Mediamax Network Limited

Guti maana ya ugoti bwa beteruri burungikwa miaka iiri kaba butegi buru, rwangi rwa kigina kwendekithia

Kenya niyo ikugita ugoti buri iguru buru kiri beteruri bukiringithanua na nthiguru ingi cia East Africa. Jaja jaumburi kiri gikaro gia Kamiti iria itegaira mantu jegie beteruri mbungene ya Senate narua baria bacemanitie na anene ba Ministry ya kigina na rwang’i ruria rurungamaira mantu jau ERC kwariria ugoti buria bwongeri kiri beteruri mwanka gicuci kia 16 kuuma kiri igana.

CAS wa rwangi rwa kigina guku Nelson Gaichuhie ariuga gutina gitumi gia kurungika mpongeeri iji gwa kagita ka miaka iiri akiuga kinya yarungikwa miaka iiri ikathira na akenya gutirio bakamitikiria. Ariuga weega nonga butejanirue buru na gucwee njira ingi cia kwongeera ugoti iti magutene.

Nawe Mwaandiki munene wa ngwataniro ya ariti ngugi guku Kenya COTU Francis Atwoli narombete rais Uhuru Kenyatta eetie gikaro gia mpwii na anene mwanya mwanya kenda bagacwaa ntaira kiri ugoti bwa gicuci kia 16 buria bukugitirwa beteruri. Atwoli ariuga ni untu bwa kurigaria kwithirwa Rais atirariiria untu bubu ntuku ijiri kuuma agucokeera Kenya. Ariuga kwiina gitumi gia gutegeera mantu jaja na mpwii uria kumbikika kenda kwonokia mukenya kumania na gwiitia kwa ngarama ya utuuro.