Itu ria kieha nirihumbite gicigo kia Rongai county-ini ya Kajiado kumana na ikuu cia andu matanyihiire anana aria marathereririo ni kiguu rui-ini rwa Kandisi kumana na mbura nene hwai wa ira.
Atandatu a aria marathereririo marenyitiriire cuuma cia ndaraca ya rui ruu no nditi ya mai iramathereria hamwe na cuuma icio.
Ihindai-ini o riu ruhonge rwa mutharaba mutune niruikitie ihoya kuri thirikari kwanirira mbura ino ta ugwati wa bururi kuria ningi moritie akenya kumateithiriria kimbeca nigwo mahote guthaitira aria mahutitio ni muiyuro wa maai na uria utigite andu makiria ma 110 makuite na makiri maingi matari na uikaro.
