Kameme FmKameme Fm News

Mutumia umwe gwikuirwo na wendia wa ciana Gatundu

Aikari a itura ria Mutunguru Gatundu ya muhuro, kaunti-ini ya Kiambu nimarurunganite magikumithia  giiko kia wendia wa gakenge kuri nathi umwe thibitari ini ya Karatu. Maiyuritwo ni matukuya aikaria aya aria aingi ao ni atumia nimokiriire mutumia umwe wa itura riri makiuga niwe ukoretwo akiria njama na nathi uyu hari wendia wa ciana cia tukenge.

Lydia Wanjiku Chege na uria kurerikana ni mumemba wa gikundi kia witikio mururu arekuirwo kunyitanira na nathi uyu kwendia mwana wa mwari uria ukurikanite ta Hannah Gathoni Macharia.

Ona gutuika nyina wa mwana uyu ari na ciana ingi igiri kurerikana ndakinyaniire wega kimeciria undu uria hihi utumite nyina kuoya kanya kau ga kwendia mwana ucio.

Ona thengia wa nyina wa mwana uyu gukorwo atahatiririkite miikarire yake, mwari kurerikana aikaraga muturire uri nakigiriko kinene undu uria utumite aikari a itura riri kuuga acokerio mwana wake mamuteithiririe kumurera.

Daisy Muthoni uria ni muikari wa itura riri niaratariria uria aikari aguku mahithukirie mwana ucio agikuo ni ngari imwe ya thirikari kahinda kanini tu thutha wa guciarirwo mucii.

Ona kuri ouguo uhoro uyu niukanitwo ni abithaa  munene wa ciana kuma Gatundu ya muhuro Gabriel Kitili kuria augite nikwari na ngirimiti ya nyina wa mwana na thirikari niundu wa miikarire yake na wathe wa meciria.

Ningi Kitili niatariirie mwana ucio ari thibitari ini wa Gatundu level 5 nigwo athurimwo makiria ugima wake wa mwiri undu uria urigithitia aikari aya uria mwana uyu angitigithukanio na nyina uria nimuciari atari na mundu uramurora.

 

 

Show More

Related Articles